മകളെ..
മറക്കരുത്..പൊറുക്കരുത്..
ഞാനെന്റെ ആയുസ്സുകൊണ്ട്
നിനക്ക് ബലിയിടാം...
അലറിച്ചിരിക്കുന്ന കാറ്റിലും
വിതുമ്മികരയുന്ന മഴയിലും
നീ കത്തിയെരിയുമ്പോള്...
ജ്വലിക്കുന്ന കനലില്
നിന് രോഷമോ...?
നിനക്കറിയുവാനാകാതെ പോയൊരു
സ്നേഹത്തില് കസ്തൂരി ഗന്ധമോ..?
ഭാഗ്യവതിയാണ് നീ...
നാവുകളെ ഭയക്കേണ്ട.
നാളെകളറിയേണ്ട..
പേരും പൊരുളുമറിയെണ്ടാ..
നേരും നേരവുമറിയേണ്ട..
കാമം തുറിക്കുന്ന-
കണ്ണുകള് കാണേണ്ടാ..
ഒടുക്കത്തെ വണ്ടിയില്
വീടെത്തുവാനിനി -
ഓടികിതക്കേണ്ടാ.
അറിഞ്ഞിട്ടുമറിയാത്ത-
ഭാവം നടിക്കെണ്ടാ..
ശവമടക്കിന്നു വന്നവര്.
ശാപം മടക്കി വാങ്ങുന്നവര്.
ഇനി കരക്കാര് മുറുക്കി പിരിയും.
കാക്കകള് ബലിചോറു കൊത്തും.
കുഴിമാടത്തില് മുളയ്ക്കുന്ന
നവധാന്യ ങ്ങളിലൂടെ..
നീ എന്നെ തിരയുമോ..
ഒരു വാക്ക് മിണ്ടുമോ..?
______________________________